منذ فتره طويلة لم اضف اى فرسات ..ليس هذا من قلتها ..فما اكثر الفرسات تلك الايام ..فقط رأفة باحوال المفروسين والمفروسات من أصدقائي ...لكن اعذرونى ..الموضوع اللى هكتبه انهارده فرسنى جدا اوى خالص....
يعنى مش قادره احطه فى قلبى واسكت ...لانى ممكن اطق وافرقع ...في حد معين انا عارفاه
هيقول واحنا مالنا المهم ان دمه مش يتحرق فانا بقول من دلوقتي معلش احنا اصحاب فاستحملوني شوية
باختصار كده الموضوع هوه عن بعض الافكار الخاطئه اللى تخص موضوع الزواج ...سواء لدى الشباب او الشابات او الاهل ..وطبعا حتى لا يتهمنى البعض بالتحيز ...ويستدعى منظمة حقوق الانسان ..انا هبدأ بالبنات اليومين دول للاسف موضوع الزواج ده مثار الى ابعد حد ...فى كل جلسه تلاقى الموضوع ده حاشر نفسه كده وانا قاعدة مع اصحابى ..تلاقى الحكايات عن العرسان ومواقفهم العجيبه وانا مع الاقارب .. ..ودى من الحاجات اللى فرسانى بجد من البنات ...مش كل حياة البنت المفروض يبقى محورها الموضوع ده ...بعض البنات بتتعلم ...عشان العريس قبل ما تنزل من البيت تلبس كويس ...عشان يمكن يقابلها العريس تتكلم فى جلسه معينه بطريقه معينه ...يمكن تعجب حد من اللى قاعدين ويبقى العريس.....وغيرها وغيرها (بجد بجد حاجه تفرس )
العجيبه بقى الاهل فى البيت ...بيبقوا غالبا عايزين يوجهوا البنت فى الاتجاه ده وبس (خاصة الام)
*اقلعى النضاره دى وانتى راحه فرح صحبتك ((شكلك فيها زى ابله فضيله )...
*يابنتى حطى شوية بويه على وشك كده بدل ما انتى بهتانه وعدمانه كده ...
*اقلعى الكوتش ده والبسيلك حاجه بكعب كده ذى البنات ...
*تعرفى نفسى افرح بيكى اوى...البنت تستهبل وتقولها (ان شاء الله ياماما اخد ترقية في شغلي قريب)...
تروح الام بصالها بصه عدوانيه وتتنهد تنهيده عميقه وتقولها :ترقية..........طيب
وغيرها بقى من الحاجات اللى تفرس بجد يعنى .....
نيجى بقى لعمو العريس ...او زي ما بسميه (هارون الرشيدى ) فكره غريبه الاطوار اصبحت مسيطره على فكر معظم الشباب وهي :هوه حد لاقى جواز دلوقتى ...ده البنات على قفى من يشيل (اسفه على اللفظ بس هيه بتتقال كده ) ومن هنا تبدأ المأساه ...ليه كل ولد يملك القدره الماديه على الزواج فاكر نفسه ياما هنا ياما هناك ...يعنى جاب الديب من ديله يعنى ..فاكر نفسه هارون الرشيدى ويبتدى بقى يتشرط ...ويتفرج على بنات الناس ويطلع فيهم القطط الفاطسه ...(بجد ..بجد حاجه تفرس ) طيب يمكن الشاب فى الفتره دى مش بيبقى ناضج كفايه ...وعشان كده فرحان بنفسه الاكثر عجبا بقى هما الاهل ...اهل الشاب طبعا كل ام طبعا بتشوف ابنها ملاك ...عملا بالمثل القائل (القرد فى عين والدته غزال)وتلاقيها بقى بتقول جمل شديدة العجب: (هيه يعنى تطول واحد ذى ابنى ...هيه لاقيه جواز ...ده ان ابنى سيد الرجاله .. هيه بس ترفض وان اجيبله ست ستها....) طب بالامانه كده هيه ممكن توافق حد يقول كده على بنتها...اكيد لا طبعا ...طب ليه بقى البهدله فى بنات الناس (بجد ..بجد حاجه تفرس )
حاجه كمان بقى يتفرسنى اكتر من الشباب ...التغير الشديد المفاجىء فى المعامله بعد كتب الكتاب ..او بعد فتره طويله من الخطوبه بعد ما كان بيتصل ..بقى مقضيها رنات ..وبعد الرنات بقى مقضيها طناش (هيه بقى اللى ترن) بعد انا تحت امرك يا عمى ..وكل طلباتك اوامر .....مش هجيب كذا اصلى مش هقدر ولو مش عاجبك بنتك عندك (اشربها) بعد الرومانسيه والورد وعيد الحب ...بقى فى مشكله كل يوم وخاصة كل عيد ام (مجبتيش هديه ليه لماما..حماتها يعنى)الغريبه انى مش لاقيه للموضوع ده تفسير يعنى المفروض انها بتزداد غلاوه فى قلبه مش تقل ولا يعنى عشان هيه
خلاص بقت تحت ايده ولا يمكن بيحاول يدبح لها القطه من اولها !!!
ملحوظة مهمة جدا الكلام اللى كتبته في البوست ده حصل فعلا وبجد مسجلاها صوت بس من غير صورة ...
فى النهايه عايزه اقول الزواج مودة ورحمة مش حرب دخلينها وزي ما هو ارتباط لأتنين فهو ارتباط لعائلتين وزي ما كل أم بنتها غاليه عندها فكل شاب برضه غالي عند اهله
دمتم طيبين ومن غير اي فرسة
(:
هناك 30 تعليقًا:
عندك حق في كلامك
بجد فعلا هو ده اللى بيحصل انتى صورتى الموضوع صح انا عندى واحدة صاحبتى كل اللى شاغل دماغها الموضوع ده ولما قلتلها ان الدراسة والشغل وحاجات كتير تانية مهمة برده بصتلى بصة غريبة اوى هههههههه
عموما ربنا يهدى الجميع
السلام عليكم
(بجد ..بجد حاجه تفرس ) .. جمله مقتبسه
شوفي ياستي .. زمان ايام الرسول عليه الصلاة والسلام .. كانت الناس بتتزوج بمهر عباره عن (تمره) عشان كذا كان ربنا مبارك لهم اما اليوم .. الناس مش عاوزه البركه بقدر ماهي عاوزه المظاهر والشكليات .. جيب بيت مش عارف شكله ازاي وجيب وجيب وجيب لحد ما الشاب يكره كلمة جيب وهات واخواتهما .. :)
البنات الأيام دي اعتقد انهم مش عاوزين الستر بس لكنهم عاوزين معاه البهرجه الكذابه ودي تناقضات ومطلوبه في وقت واحد فالعريس اللي يحققها ويتحمل سخافات المظاهر اللي هوه مش مقتنع فيها اصلاً ولكنه حققها وعملها ..يكون داخل على بيته وقلبه شايل من العروسه واهلها :)
والله الحياه سهله وبسيطه ومش محتاجه صناعة هم للإستهلاك المحلي ..
موضوعك حلو وعلى الرغم من انه نقدي لحاجات موجوده الا انه ظريف :)
في امان الله
ممكن سؤال
هو مين هارون الرشيدى
انا بصراحة اعرف هارون الرشيد
واعرف حلوانى الرشيدى
هو هارون ده ابن الرشيدى الميزان
هههههههه
معلش القافية حكمت ههههه
بالنسبة للبوست
طبعا دى حاجة تفرس وتفقع المرارة ده لو فيه اصلا مرارة
مع الاسف الحوار ده بيدور كثيرا فى الخطوبة والتعارف وكده وكاننا اصبحنا سلعة تباع وتشترى واصبحت البنت وكانها جارية فى سوق الرقيق اللى يدفع اكتر يشيل
ولا يوجد ادنى احساس او شعور بادميتها ومشاعرها كانثى
الحياة المادية فرضت علينا اشياء غريبة جدا
وكثير من الشباب والبنات ظلمتهم ظروفهم الاجتماعية
تحياتى وتقديرى
بصي انتي جبتي المفيد في اخر سطر كل واحد ولد او بنت غالي عند اهله علشان كدة الاهل ممكن يعملو مشاكل
كمان المشكلةالاقتصادية ووجود الكثير من (الحرامية والهليبة ) اللي سرقو فلوس البلد وطفشو دة ادي لبطالة ادت لعنوسة زودها زيادة معدل المواليد الاناث كل دة خلى بعض الشباب اللي عنده القدرة علة الزواج زي مانتي بتقولي يحس بنفسه وانه حاجة كبيرة قوي لأنه عنده اللي مش عند كنير غيره لكن هو برضه لازم يعرف انه محتاج للست زي ما الست محتاجة له
وانه العلاقة الزوجية وقودها المشاعر الطيبة والكلمات الحلوة
وحتى الكلمة الطيبة صدقة واعظم الصدقة من كانت علة ذوى القربى
ربنا يهدينا جميعا للصواب
لك كل التحية و الود
ازيك يا أستاذة ايه الأخبار
بضم صوتى لصوتك فى ان الموضوع مش خناقة
واننا لوفاهمين اننا بنأسس حياة كاملة أكيد الحب والاخترام بين الطرفين هيزيد مع الوقت مش العكس
حالة التأهب اللى حاصلة والاستعداد مقدماً للإحباط نتيجة النماذج الرديئة التى يقدمها المتزجزن (كلام الأزواج على بعضهم) هو العامل الرئيسى لتصور الجميع أن جمال أيام الخطوبة سينتهى بمجرد كتب الكتاب ... ولذلك يستسلمون للنمطية مع أول موقف سلبى
دمتِ بكل الخير والسعادة
أعتقد مكانش فى موديريش فى المرة اللى فاتت
واضح ان فى مضايقات فى التعليقات
حضرتك عارفة رأيى ... حذف التعليق الغير لائق .. هو أكثر ما يستحقه صاحبه من الاهتمام
دمتِ بخير
الموضوع جميل وبصراحة مايحرقش الدم ولا حاجة (طبعا زعلتي) لأن فعلا اللي حكيتي عنه للأسف الشديد مظبوط
المشكلة الأساسية وزي معظم المشاكل مرجعها الأساسي قلة الإيمان وللأسف الشديد إن نظرة الناس وتقيمهم للآخر أصبحت لها عناصر مختلفة لا تمت بصلة للقاعدة (مش بتاعة أسامة بن لادن) ولكن القاعدة التي وضعها رسول الله صلى الله عليه وسلم في حالة اختيار العروس "فاظفر بذات الدين" وفي حالة اختيار العريس "من ترضون دينه" يعني العنصر الفعال في أي تقيم لابد أن يكون فيما يملكه الآخر من دين وخلق وليس ما يمكله من الماديات.
إختلاف معايير التقيم عن تلك التي وضعها سيد الخلق هي السبب الرئيسي فيما أشرتي إليه في موضوعك المطروح
تحياتي
بصراحه كلامك عن البنات ماعجبنيش قوى
لانك اكيد لسه ماعندكيش بنت ..انا عندى بنت اموره عندها 8 سنين
ومع ذلك باهتم جدا بطريقة لبسها وشعرها..ومابحبش انها تخرج لابسه اى حاجه والسلاااام..لانها بنتى وبحبها اكتر من نفسى
هما الامهات كده...انا زمان كنت بازعل من ماما لما كانت بتقول نفس الكلام ده ..بس قالتلى (لما هاتخلفى ..هاتعرفى )وفعلا معاها حق
مابالك بقه بأم بنتها قربت مثلا على 30 سنه ولسه ماتجوزتش ..اكيييد الام بتبقى قلقانه عليها جدا ..فده طبييييعى...لان بصراحه كل الرجاااله سطحييين ..وبيهمهم المنظر قبل مايفكروا الجوهر شكله ايه..والراجل اللى هايقول غير كده يبقى كداااااااااااااب كبييير وبيضحك على نفسه...طبعا الاخلاق مهمه ..بس لازم الشكل برضه يكون فى اهمية الاخلاق
يعنى اللبس المتناسق المحترم مع الكعب العالى والمكياج الهادى ماهواش عيب فى نظرى..ومش لازم اعمله علشان الفت نظر حد معين وبعد كده اخرج مبهدله..لأ فيها ايه لما اخرج من بيتى كل يوم وانا مهندمه وكويسه..
وشكلى مقبووول؟؟؟
ده رأى فى القضيه بصراحه وسورى للتطويل..
تحياتى
السلام عليكم:
دى اول زيارة ليا وان شاء الله مش اخر زيارة..
بصى أولاً فى موضوع البنات:
البنات بطبعهم رومانسى .. عندهم حكاية المشاعر دى حاجة مهمة جداً يمكن تكون الاهم كمان.. عشان كدا يبحثن عن الحب وعن شريك الحياة اللى يملأهن بالرمانسية ويحتويهن بحنانه ودا مش عيب فى الانثى بالعكس دى أحلى حاجة فيها رقتها وحنيتها ورومانسيتها ..
ثانياً: تصرف الامهات فأنا بردو عذراهم والله لأن كل أم نفسها تشوف بنتها وهى لابسة الفستان الابيض .. كل أم نفسها تشيل ولاد ولادها.. كل أم خايفة على بنتها وشايفة انها هتطمن على بنتها لما تكون فى بيت راجل يحافظ عليها..
ثالثاً : الرجالة.. فالنقطة دى انا متفقة معاكى فيها جداً جداً جداً لانى شفتها وسمعتها.. أعرف واحد قريبنا شاب ولسة متخرج ووالده جاب له شقة على طول والولد كمان اشتغل شغل كويس يعنى بقى شايف نفسه حقيقى مش ناقصه حاجة وبقى يتفرج على فلانة وعلانة ويدخل بيت دى ويخرج من بيت دى وبقى شايف ان كل البنات مش عجبينه من منطلق ان عريس لقطة ومش ناقصه حاجة وأى جارية تتمناه وتنبوس ايديها كمان..
رابعاً حكاية الامهات اللى بيقولوا ست ستها وشايفين ابنهم كأنه ليوناردوا ديكابريو حتى ولو كان شبه اسماعيل يس فدى بقى برده واحدة قريبتى لدرجة انها قلبت خطوبة ابنها نكد فى نكد لأن العروزسة مش عاجباها.. وعملت تصرفات متتحكيش عشان ايه؟؟ عشان العروسة سمرا ولما نقولها يا ستى ما هو ابنك كمان اسمر تقولنا لاااااا انا ابنى زى القمر هى تطول أصلاً!!!!! دى بقى اللى كانت فرسة
السلام عليكم
بجد عندك حق تتفرسي وانا والله مفروسه اكتر منك
بس تعرفي من ايه من المقياس اللي بقوا بياخدوه في الموضوع دا
بقوا يخلوا البنت يكون كل تفكيرها في شكلها وازاي تكون مضبطه نفسها من برا منظرها الخارجي ويا ولها وسواد ليلها لو لبست لبس محتشم اوووووووي يبقي جابته لنفسها ومحدش هيعبرها
ولا حول ولا قوة الا بالله
وفي الاخر كل شئ نصيب
واحلي شئ لازم يعرفوه الشباب
ان خير متاع الدنيا المراة الصالحه
كفايه لحد كدا
غربتي
هي مشكلة حلها صعب في الظروف اللي عايشنها
مفيش فلوس ولا شغل ولا شقة ولا حاجة يعني اللي عنده الحاجات دي يبقى ملك يحط رجل على رجل ويتشرط والبنت يعيني غلبانة مستنية سي السيد لغاية ما يخبط على الباب ومدام مخبطش تدور هي عليه في فرح , في مناسبة , ولو حتى في الأتوبيس المهم يجي
برنسيس
ههههههه كل بنت اكيد نفسها ترتبط بس في بنات عقلها خف من كتر التفكير في الموضوع ده
وبينسوا ان لكل شيء وقت وميعاد مقدر له
علي محمد
وعليكم السلام ورحمة الله وبركاتة
زمان مكنش في حد بيبص لحد وكانوا مؤمنين جدا بان المظاهر ما هي الا بطر علي نعمة ربنا
البنت لو تعاملت بالطريقة دي بيكون السبب في ده هو البيت اللي تربت فيه
والأم دايما تقولها انتي ست البنات لازم يجيلك اغلي شيء
فلو البنت سمعت الكلام ده من امها اكيد هتتصرف علي هذا الأساس
في رعاية الله
خالد
معلش كنت باكل حلاوة طحنية والدنيا اتلخبطت معايا (:
مش معاك ان الحياة والظروف هي السبب
لو فعلا الظروف هي السبب المفروض نكيف احتياجاتنا علي حسب ظروفنا
بعض البنات بتتصور ان طالما هي جميلة يبقي هتتجوز المليونير المزعوم زي الافلام العربي بالضبط
وتمر الايام والفارس ميجيش وتفضل الأميرة مستنية
لو كل بنت وولد يحكموا عقلهم هيقدروا يضبطوا حياتهم بامكانيهم الصغيرة
تحياتي ليك
مصطفي ريان
انهم محتاجين لبعض وأنهم سكن لبعض
هي دي النقظة اللي بينساها الجميع
الزواج عمره ما كان شبكة ومهر وفرح
الزواج سكن وموده ورحمة ومشاعر طيبة
وزي ما انت قولت الكمة الطيبة صدقة
تحياتي وتقديري
ازيك يا دكتور نورت المدونة
كلامك صح جدا يا دكتور
من اول يوم في الخطوبة البنت بتسن سننانها عشان لو خطيبها حست انه لعب بديله
والحماه بتتربص بالعروسة وتتصيد الأخطاء
ومع الوقت المشاعر الطيبة بتموت وبتفضل الحرب الأهلية بيهم
دمت بكل ود وخير
دكتور احمد
فعلا حصل مضيقات في التعليقات ومكنش عندي استعداد ان زوار المدونة يتأذي مشاعرهم زي ما انا مشاعري اتأذت بالتعليقات دي
المودريشن كان لأنشغلي واكيد هيتشال باذن الله
مصري
شيء هايل ان الموضوع عجب حضرتك
لا يا فندم مش زعلت ولا شيء
هما لو فاكرين القاعدة اللي وضعها الرسول للزواج أو فاكرنها مكنش الشباب سابوا ذات الدين ودورا علي ذات الجمال فقط
ومكنش البنات دوروا علي المظاهر الكدابة لمجرد انهم يملكون شيء من الجمال
تحياتي وتقديري
نورت المدونة
بنت الغربة
انا فعلا مش عندي بنت لاني انا لسه مش متزوجه
ادعيلي ربنا يرزقني برجل طيب
ربنا يخلي بنوتك يارب ويبارك فيها
شوفي ياستي مقصدتش انهم يخرجوا ويبسوا اي شيء والسلام
قصدت انا الأم لما بنتها بتوصل لسن الزواج بتهتم بيها زيادة عن اللزوم لدرجة انها مش بيعجبها اي شيء من اللي البنت بتلبسه قبل كده
اكيد اي ام بتقلق علي بنتها لما بتأخر زواجها لكن لازم نعرف ان ده نصيب وقدر من ربنا
زي ما الرجالة بتهتم بالمظهر البنات كمان اصبحت بتهتم بالمظهر اكتر
مين قال البنت تخرج مبهدلة
لكن لو تفتكري كويس اي بنت يوم ما بيكون في مشوار راحاه ومتوقعةانه يكون في عريس بتهتم بزيادة اوووووووي
ومش بتكون في نفس الشكل العادي بتاعها
مش كده والا ايه؟
تحياتي ليكي ونورتيني
barbie girl
وعليكم السلام ورحمة الله وبركاته
نورتيني يا باربي
البنت بطبيعتها مشاعرها فياضة ودي نعمة من ربنا
طبيعي ان اي ام تخاف علي بنتها لكن لازم الكل يفتكر ان ده رزق من ربنا ولكل شيء وقت وميعاد
مش الراجل بس هو اللي بيتشرط بس البنت كمان وانا مريت ببنات فعلا بيدورا علي المظاهر وبس
اي ام بتحس ان عروسة ابنها جاية تاخده منها والعكس صحيح
فكل ولد غالي علي امه وكل بنت برضه غالية علي امها
لكن في النهاية دي نسب عائلتين مش حرب
تحياتي وتقديري
غربتي
وعليكم السلام ورحمة الله وبركاته
زي ما انتي قولتي كل شيء نصيب
وللبنت والشاب لازم يفتكروا قاعة الزواج اللي نص عليها شرعيتنا
تحياتي
قوت القلوب
نورتيني
شوفي يا سيتي لو للبنت نصيب انها هتقابلوا ي الأوتوبيس زي ما انتي قولتي
يكون ده نصيبها
زمان أهلنا مكنوش متمسكين بالمظهر زي دلوقتي وكانوا عايشين ومبسوطين لان المشاعر والود والكلمة الطيبة كانت بينهم
تحياتي ليكي
اول مره ازورك بس بجد كلامك الى كان فبالى من فتره وشايفاه فكل مكان حوليا ومش فاهماله اى سبب
بجد محتاجين كلنا نصحح مفهومنا عن الزواج والتعامل بين الخطيبين والزوجين واهل الزوج والزوجه
السلام عليكم:
بصراحة انا مختلفة معاكى فى النقطة دى"اي ام بتحس ان عروسة ابنها جاية تاخده منها والعكس صحيح"
لا مش اى ام بتحس بكدا .. لأن فى امهات بتعامل عريس بنتها على انه ابنها وعروسة ابنها على انها بنتها يعنى الحالات اللى بتتكلمى عنها هى حالات مرضية انا سمعت دكتورة نفسية بتقول كدا
عندك حق
وليكى حق تتفرسى لان فعلا كل لما الواحد بيشوف الناس ويتعامل معاهم بيتفرس اكتر من عمايلهم
مدونة رائعة
دمتى بخير
..ليه كل ولد يملك القدره الماديه على الزواج فاكر نفسه ياما هنا ياما هناك ...يعنى جاب الديب من ديله يعنى ..فاكر نفسه هارون الرشيدى ويبتدى بقى يتشرط ...ويتفرج على بنات الناس ويطلع فيهم القطط الفاطسه ...(بجد ..بجد حاجه تفرس ) طيب يمكن الشاب فى الفتره دى مش بيبقى ناضج كفايه ...وعشان كده فرحان بنفسه الاكثر عجبا بقى هما الاهل ...اهل الشاب طبعا كل ام طبعا بتشوف ابنها ملاك ..
\\\\\\\\\\\\\\\\ ********* \\\\\\\\\\
بصي يا ستي .. لأن الشاب عشان يتزوج يا بيصرف دم قلبه عشان يجهز "خندق" الزوجيّة، يا أهله بيصرفوا دم أهلهم عشان يجهزوه !
عشان كدا بيتشرط ويتعزز ويتأمر .. لأن الجوازة تحسي كدا إنها حبس مؤبد، بحس بجد من معظم كلام الستات " وهم أصل البلا في حاجات كثير للأسف !" إن الستات اللي في ناحية أهل البنت عايزين "يضمنوا" مستقبل البنت زي ما بيقولوا، و"ستات" أهل الولد عايزين واحدة "من غير جناحات ولا لسانات !" ..!
عادات جاهلية وألعن من الجاهلية كمان !
زمان كان الرجل مستقلا بذاته، الآن تجدي أمه تتحدث عنه وتطعمه في فمه حتى يكبر ويبقى أطول منها ..
دا غير الأمهات الأنانيات اللي بيتدخلوا في كلّ حاجة على أساس إن ليه تتعب فيه وتربي دا كله وفي الآخر حد ياخد على الجاهز !
نادرًا جدا لما تلاقي حد بيتعامل مع الموضوع بسلاسة و"ربنا يهنيهم" ! بلا مزيد هراء ..
الحل: ممكن في الزواج عن بعد !
تحياتي
هههههههههههههههههههههههههه
والله معاكى الف مليون حق:)))
إرسال تعليق