الخميس، 24 يوليو 2008

عواجيز الفرح.....

تنوية : لمعرفة كل جديد في مدونتي الجديدة مجرد فكرة http://mogaredfekra.blogspot.com/

عواجيز الفرح.....


بدأت اجازة الصيف وكالعاده تنهال علينا دعوات الافراح من الاقارب والاصدقاء (ذى ما تكون الناس مستنيه الاجازه بفارغ الصبر).....طبعا طنشت معظم الدعوات نظرا لظروف شغلي (طبعا حاجه تفرس الناس كلها بتخرج وتتفسح وانا مطحونة في الشغل )المهم قررت ان احضر احد هذه الافراح وكان فرح بنت عمي (يعنى قلت افك عن نفسى شويه احسن انفجر )......بس اكتشفت اننا بدل ما افك عن نفسى رحت عشان اتفرس اكتر ما انا مفروسه جاء اليوم الموعود وبدأت استعد انا وجميع افراد الاسره الكريمه للذهاب الى ذلك الفرح .......وبينما انا أعد ملابسى دخلت على والدتى ونظرت الى بعجب قائله:انتى ناويه تلبسى اللبس ده (كنت قد اعددت جيبه جينس وعليها جاكت فاتح اللونو جزمة فلات لونها ملائم للبس ..امال مش فرح بقه)........رديت قائله:وماله اللبس ده ماهو ذى الفل اهوه.....ماما:حد برضه يروح الفرح بجينس ....رديت:وماله ده حتى مريح جدا غير ان الجينس ده موضه فى اى وقت .......ماما:لالالالا سيبك من الكلام ده والبسى حاجه عدله وكمان البسى الجزمه امو كعب طبعا قالت الجمله بغضب شديد وبعد برهه وجدتها تعود قائله :اوعى تكونى ناويه تلبسى النضاره ؟؟ رديت:ومالها بقى النضاره ده انا حتى بحس انها جزء من شخصيتى( وبيني وبينكم نظري ضعف من كتر استخدام الكمبيوتر في شغليوأكتر الوقت كنت بنسي البسها لغاية ما نظري ضعف) ......ماما:لا شخصيتك ولا شخصيتى وعشان طبعا الليله تعدى على خير نفذت كلام ماما ولبست الطقم اللى هيه شايففه انه ملائم والجزمه امو كعب(طبعا مكنتش مرتاحه خالص ما هى راحة الواحد بتبدأ من قدميه) وكمان شيلت النظارة (ودى كانت اول حاجه تفرسنى فى هذه الليله ) ...وهى ان معظم الناس يربطون انوثة البنت بكعب الجزمه وملابسها المزركشه وغيرها من الاشياء العجيبه
نزلنا من البيت واتجهنا الى مكان الفرح ...دخلنا القاعه ووجدت المدعويين قد انقسموا الى جماعتين يفصلهم المكان الذى يجلس فيه العروسين ......اول ما وقعت عيناى على هذا المنظر شعرت وانى قد دخلت الاستاد لحضور مباراه بين فريقى الاهلى والزمالك حيث يأخذ مشجعى كل فريق احدى الجهات (بجد بجد حاجه تفرس ....ليه يعنى يبقى اهل العريس فى ناحيه واهل العروسه فى ناحيه تانيه ...مش الجواز ده بيقرب ما بين الاسرتين ليه احنا بنبعدهم عن بعض ...ولا ده خوف من الاختلاط وانتشار الاوبئه ) وكل ما ابص على طربيزه الاقى حد قاعد وحاجز الطربيزه لبقية العيله(اللى هو مش متأكد هما هيجوا ولا لأ وقريبي منهم) وده تقريبا كان حال معظم الطربيزات (بجد بجد حاجه تفرس...لو اعرف بس اللى اخترع مبدأ الحجز ده كنت قتلته ) وبعد صعوبه وجدنا طربيزه واستقرينا عليها (على فكره احنا كنا من مشجعى الاهلى..قصدى العروسه )............وبعد دقائق من الانتظار وصل العروسين وبدأت مراسم الاحتفال وكانت البدايه بأسماء الله الحسنى ثم مجموعه من الاغانى الدينيه الخاصة بالأفراح (قلت فى نفسى الحمد لله مفيش اغانى هابطه يعنى الواحد ضمن انه مش هيصدع وكمان مفيش ذنوب) ولكنى فوجئت بعد فتره انهم بدءوا يشغلوا اغنية العنب والمولد وغيرها من الاغانى اللى تفرس.....الغريب ان فى ختام الحفله رجعوا شغلوا اغانى دينيه تانى( بجد بجد حاجه تفرس .....لماذا يبدءون ويختمون بأغانى دينيه وفى المنتصف وصله من الاغانى الهابطه ...وكأن المبادىء تتجزأ...وهل يليق بأسماء الله الحسنى ان تنطق فى مكان ثم يتبعها ذلك الهلس ...ولا النا س بتحاول بتضحك على نفسها وبتحاول تخدر ضميرها بتلك المقدمه والخاتمه؟؟؟ ) وبينما انا جالسه وسط هذا الصخب سمعت احدى السيدات تقول (هو العريس ماله مكشر كده ليه ) بينما تقول اخرى (ولا العروسه شايفه عماله تضحك اذاى )........وغيرها من التعليقات التى ينطبق عليها المثل القائل(لا بيعجبه العجب ولا الصيام فى رجب )(بجد بجد حاجه تفرس ....عندما تتحول تلك المناسبه الجميله الى مجرد جلسات نميمه.....وفي وسط سماعي لكلامهم اذا بماما فجأه وبدون مقدمات اصدرت فرمان بأني اقوم من مكاني وأقف جنب باقي بنات العيلة معرفش ليه؟؟ ( أنا أصلا مش قادرة اقف من الكعب اللي لبساه ..ومحدش حاسس بيه) المهم قولت عدي يا ليله وقومت وقفت خمس دقايق ورجعت تاني لمكاني وطبعا ده مش عجب ماما..
وبعد فتره جاءت اللحظه الحاسمه ....انها لحظه بالغة الاهميه ....وهى لحظة افتتاح البوفيه ....بدأ الصراع ...نعم انه الصراع من اجل لقمة العيش ..بالرغم من ان الناس شيك جدا ومستواهم عالى وكانواقاعدين على الطربيزات مرسومين على الاخر لكن الوضع مختلف عند الاكل ...الكل طبعا عمال يملى فى الاطباق وممكن تلاقى حد بيديك بالكوع عشان توسع له او حد يدوسلك على ديل الجيبه ويكعبلك (ففى هذا الصراع جميع الاحتمالات وارده )...طبعا معرفتش اجيب حاجه فى طبقى وأستسلمت للأمر الواقع(وقولت لماما بلهجة عتاب مش كنت جيت بالجيبه الجينس والجزمه الارضى عشان اعرف اتصرف D: )(اللى فرسنى بقى ان بعد الانتهاء من الاكل وجدت الطربيزات مليانه اكل ...يعنى الناس ليه تتخانق وتتصارع وتأخذ اكبر كميه من الاكل وفى الاخر ميكلهوش ويتساب على الطربيزات ...هى طفاسه واهدار للمال وخلاص...بجد بجد حاجه تفرس) انتهى الحفل وعدنا الى منزلنا ولسان حالى (مش كنت قعدت فى البيت قريتلى كلمتين احسن من الفرسه اللى انا فيها دى ...
وبعد هذا الحفل قررت قرار خطير وهو: انى لن اقيم حفلا يوم زفافى .....اما اذا اصر العريس المرتقب على هذه الفكره المجنونه فستكون بالشروط الاتيه :
* زرع كاميرات خفيه فى جميع ارجاء القاعه لتسجيل كل ما يحدث من صغيره او كبيره (عشان اشوف الناس اللى عماله تنم دى ...خاصة اللى بينموا على العروسه وابقى اشوف شغلى معاهم بعد كده)
* عدم تقسيم القاعه الى نصفين (نص لاهل العريس واخر للعروس)وذلك لضمان المساواه وعدم التفرقه العنصريه بين المدعوين
اما ان تكون جميع الاغانى دينيه او كلها هلس(مش حبه كده وحبه كده)
الغاء فكرة البوفيه ..تلك الفكره التى لا تتناسب ومجتمعنا فهى اهدار وتبديد للمال العام(يعنى كل واحد ياكل فى بيته ويريحنا)
أيه رأيكم بقي في قرراتي مش عندي حق؟؟!!!

هناك 18 تعليقًا:

عاشقة القمر يقول...

سلام عليكم اول معلش انتي بتشتغلي ايه
ان شاءالله دايما يكون الافراح موجدة الدينيه الخاصة بالأفراح بجد قصة مش عارفه قصة بدايه اغاني الدنيه ونصف اغني هابطه قينعايه الدنيه بجد انا بتفرسه في اغاني هابطه برضو قصه العروس والعريس كل واحد في لوحدهم اتمني زيارة مدونتي

عاشقة القمر يقول...

اول تعليق انا

زهرة الجنة يقول...

وعليكم السلام ورحمة الله وبركاته
أهلا عاشقة القمر
مبسوطة انك اول تعليق

اما عن شغلي بشتغل محاسبة(بتاعت أرقام يعني)

اما عن موجة الأغاني الدينية في أفراح كتير بتكون دينية بس او من بدايتها أغاني عادية
بدلا من التناقض الغريب اللي بنشوفه الايام دي

اماعن الأنقسام بين الأسرتين فده من الأخطاء الشائعة وكأنهم أعداء
واتمني ان ده يزول

تحياتي وتقديري

عاشقة القمر يقول...

ربنا يكرمك وياعدة قي شغلك يارب عقبال اشتغال انا كمان

عاشقة القمر يقول...

ويساعدك دي كله نقصه

باسم يقول...

السلام عليكم و رحمة الله و بركاته
اختى زهرة
ربنا يبارك بك و فيك و لك بكل خير
عواجيز الفرح ؟
للاسف هما مش فى الفرج بس
دول فى كل مكان تقريبا حتى فى العزاء
نسأل الله العفو و العافية لهم و منهم و لسائر المسلمين
اما الاهلى و الزمالك قصدى اهل العريس و العروسة فزى ما انت قلت قبل ذلك فى حالة حدوث خلافات كيف يكون الحال فهم من البداية موقفهم واضح الا من رحم ربى
اما اختلاط الحابل بالنابل فى الافراح فحدث و لا حرج و لا اكتمك سرا
انا عشان لا اضايق نفسى و لا اكون سببا فى ضيق احد لا احضر الا الافراح ذات السمت الاسلامى
غير ذلك يااما اذهب كتب الكتاب فى المسجداو منزل العروس او اذهب للعروسين بعد الزفاف فيما يطلق عليه السبوع

زهرة الجنة يقول...

وعليكم السلام ورحمة الله وبركاته
أخي باسم
يبارك بك وفيك ويجزيك الله خيرا مني

عندك حق ان هما موجودين بكل مكان
وعدم ذهابك الا للافراح الاسلامية ده شيء كويس جدا .... بس أنا بحاول أنفذه شوية شوية لاني لو نفذه مرة واحد ماما هتعلن علي الحرب والأحكام العرفية D: ومش معني ده اننا بنقول لكل الناس تعمل كده بس ياريت بلاش تناقض في أفراحهم

بس مش قولت لي ايه رأيك بقرراتي؟؟!!

باسم يقول...

السلام عليكم و رحمة الله و بركاته
تسأللين عن رأى ّ فى قراراتك ؟!؟

ان شاء الله سيكون هناك حفل لكى يفرح بكم اهلكم و محبوكم
لكن شكل هذا الحفل مرجعه لك و لزوجك ان شاء الله
اهم شئ فى الحياة ان نجاهد قدر المستطاع ان نحيا وفقا لما اراد الله
لم ينهنا الله ان نفرح و ننشر الفرج بيننا ابدا ابدا
بل ان مجلبة الفرح و السعادة على المسلمين مطلب من مطالب الشريعة
فلنفرج اذا و للنشر الفرج و السعادة بيننا باى طريق كان و لكن وفقا لما يريد الله لا اكثر و لا اقل لكى تصاحبنا مرضاته و محبته و معيته دائما فى سائر امورنا
و دمتم فى خير و سعادة D:

الهدهد الطائر يقول...

الافراح هي احد وسائل علاج مرض التباعد الاجتماعي في عصرنا.
فحفل الزواج قد يكون فرصة لزواجات أخرى.. لذلك يجب تمييز الحضور حتى لا يختلط الحابل بالنابل.
فكل تصرف له معنى و مدلول.. فالاطراف الاخرى يجب ان يعلموا بأننا متدينين و لكننا لسنا متزمتين.
و يجب ان يعلموا بأننا وافقنا على نسبهم اكراما منا لأننا الأفضل..و غير ذلك من مظاهر الحوار الاجتماعي الخفي.
في النهاية هي مسرحية يجب ان يلعب الجميع دوره فيها باتقان.

.....تحياتي...

زهرة الجنة يقول...

وعليكم السلام ورحمة الله
نعم اخي صدقت علينا ان نحيا كما أمرنا والله

ولم أقصد ان الله تهانا عن أن نفرح

ولكن ما أقصده هو افراح هذه الايام تجعل الانسان يلتزم الجانب الأخر

أشكرك علي مرورك وأهتمامك بالرد
دمت في سعادة

زهرة الجنة يقول...

أهلا بك أيها الهدهد الطائر

أتفق معك اخي علي أن الفراح هي احد وسائل علاج لمرض التباعد الأجتماعي

واتفق معك ايضا في تمييز الحضور لانه فرصة لزيجات أخري وهذا واقع موجود

ولكن أخي ... ليس معني رفضنا للأغاني الهابطة الموجودة بالأفراح أننا متزمتين

فعندما يتزوج الأنسان فأنه يبدأ حياة جديدة فهل يبدأ حياته علي شيء لا قيمة له ؟
ام يبداها علي شيء ذو قيمة

تحياتي لك
وشرفت بمرورك

ولد مصري يقول...

معلش انا عايزك تستهدي بالله كده وبلاش تهور في موضوع القرارات اللي ناوية تاخديها في موضوع الفرح ده

بالنسبة لفصل القوات (أهل العريس وأهل العروسة) فده لازم وياحبذا كمان لو تقدري تجيبي مراقبين دوليين او قوات حفظ السلام وتحطيهم على الحدود ومايمنعش برضه عربيتين أمن مركزي محدش عارف الظروف

بالنسبة للأكل متحوليش كان غيرك أشطر هيتعمل بوفيه يعني هيتعمل حتى لو كان "شندوشتات" جبنة رومي بايظة ولانشون ميت المهم الناس تزلط اي حاجة

واحسن حاجة في موضوع الفرح ده إنك تكبري دماغك وماتفكريش فيه كتير كله بيعدي واللي عاوز ينبسط بينبسط واللي عاوز يتنكد بيتنكد أهم حاجة العريس والعروسة ينبسطوا ومايعملوش فرح ياخدوا فيه ذنوب لحسن هيه مش ناقصة

بس الموضوع لذيذ واسلوب كتابته هايلة

تحياتي

blue-wave يقول...

هههههههههههههههه
والله دمك زى العسل
وانا متفق معاكى تمام فى قراراتك:))

زهرة الجنة يقول...

أهلا " ولد مصري" مرحبا بك
نورت البوست بمرورك

أما عن أهل العروس والعريس أنت خلتني أحس من كلامك أنها مظاهرة مش فرح
المفروض ان الزواج بيكون لأسرتين من فردين وبس

أما موضوع البوفية هو حل من أتنين أما ياكلوا قبل ما يجوا الفرح أو ياخدو الأكل وهما ماشيين D: بس المهم محدش ياكل أثنا الفرحD:


وعندك حق جدا في انه مش المفروض العروسه والعريس مش يبدوأ حياتهم بذنب ....هي فعلا مش ناقصة

متشكرة مرة تانية لمرورك

زهرة الجنة يقول...

أهلا دكتور عمرو

متشكرة علي مجاملتك الطيبة جدا دي

والحمدلله أن في حد متفق معايا

متشكرة لمرورك بالمدونة
نورتD:

Desert cat يقول...
أزال المؤلف هذا التعليق.
nona يقول...

اختى زهرة
صدقتى فيما قولتى
افراحنا باقت مصدر للذنوب من اول الاغانى لغاية النمينة
تعرفى انى تقريبا بطلت اروح افراح و بتحجج انى من الدوشة و الهايصة بيجيلى صداع و مش بقدر اقعد فترة طويلة فى مكان مغلق و الحمد الله الخطة بتنجح بنسبة 90 فى المائة اما لو فرح اقارب درجة اولى لا مفر و الا حدثة قطيع بين افراد الاسرة
تعرفى كمان ان الافراح الاسلامية مش بتعجب بعض الناس
يعنى عندك فرحى كان اسلامة و مفهوش اغانى و كان منفصل بس برضة ما عجبش لا الاقارب و لا الجيران حتى حماتى كمان ههههههههههههههه
ربنا يهدينا جميعا

زهرة الجنة يقول...

أهلا نونا
نورتي
في الحقيقة الأفراح في بعض الأوقات بتقربنا من صله الرحم وبالتالي مش دايما هنقدر نعتذر

ومفيش انسان هيقدر يرضي جميع الناس
يعني الفرح الأسلامي يرضي فئة معينة وباقي الناس لا

لكن المهم نرضي ربنا في الأول عشان نبتدي حياتنا صح وبلا ذنوب

اتمني لك حياة سعيدة