الثلاثاء، 19 أغسطس 2008

وأشمعني أنا ؟؟!!




الفرسة دي المرة دي مختلفة تماما .... هتسألوني ليه؟؟ أقولك ليه ...

أصل اتفرست من نفسي المرة دي D: .. المهم احكيلكم اللي حصل


طبعا أنتوا عارفين ان رمضان قرب " كل سنة وأنتوا طيبين " المهم ان من سنة تقريبا بدأت أشتري فوانيس رمضان....


في حدود خمس فوانيس " مش تفهموني غلط مش ليا طبعا" الفوانيس دي لأبن اختي وباقي أطفال العيله وطبعا عشان انا خالتو ... لازم


أشتري فوانيس وأدي عيدية وأشتري هدايا أعياد الميلاد .... وطبعا أشتريت امبارح خمسة فوانيس بس طبعا مش زي فوانيس زماان


فوانيس شكلها غريب جدا وكماان أسعار ناااااااار وكان لازم الفوانيس تكون متطابقة من حيث شكلها " والا تقوم حرب عالمية بس بين


أطفال العيلة "


بس بيني وبينكم حسيت بجو رمضان وكمان أفتكرت أيام زماان " مش زماان قوي يعني " لما كان عندي فانوس وكنت بنوره من بعد
الفطار لغاية السحور ..


وحسيت بحزن شديد جدا لان مفيش حد بيجيبلي فانوس دلوقتي زيما كان بيحصل زماان " وطبعا أتفرست من نفسي جدااااا" لاني أشتريت


خمس فوانيس ومش جيبت لنفسي .... بصراحة كان نفسي جدا أشتري فانوس لنفسي حبيت افتكر بيه أيام وحشتني جدا وتفسي أنها ترجع
بس لاقيت نفسي أترجعت عن الفكرة...


ولما وصلت البيت لاقيت الأساتذة الصغار عندهم خبر أني اشتريت لهم فوانيس ...وطبعا اول ما دخلت من الباب لاقيت هجوم حصل عليا


وترحيب غريب منهم " وطبعا أتفرست أكتر... أصل الترحيب ده مش بيحصل الا في أعياد ميلادهم " المهم لاقيتهم واقفين ومش عاوزين


يتحركوا " وانا عاملة اني مش واخدة بالي" فتبرع الأستاذ يوسف وقال : ( خاتو ..هاتي يلا افانوس) وطبعا هو يقصد ( خالتو ..هاتي يلا
الفانوس ) D:


وطبعا مضطرة طلعت الفوانيس وكلي اسف لاني عارفة أنها مش هتفضل سليمة لغاية أول يوم رمضان ... وبعد ما اخدوا الفوانيس مشفتش


حد منهم لباقي اليوم حتي وقتنا هذا ..وطبعا قضيت باقي اليوم في استعادة ذكرياتي عن فانوسي العزيز " وطبعا الفرسة كانت لسه مستمرة
جوايا" وأتمنيت لو كنت جيبت فانوس ....


ودخلت ماما وانا منهمكة بالتفكير وسألتني كالعادة : مالك كده بتفكري في ايه..في موضوع مهم ؟؟


قلت : اكيد يعني ... فرحت ماما جدا "وفكرت أنه موضوع خطوبة D: " وطبعا انا خيبت أملها وقلت لها : كنت عاوزة أشتري

فانوس أشمعني أنا ؟؟!


وكان رد فعل ماما انها بصيت لي وسكتت "وطبعا بتقول في بالها البنت دي حصلها شيء بعقلها"


ورجعت انا لتفكيري في الفانوس ... وفي نفس الوقت رن تليفوني ولاقيت صديقتي علي التليفون ... واول ما سمعت صوتها قولت لها


عاوزة اشتري فانوس زي زماان ... طبعا صديقتي حسستني اني طلبت طلب غريب !! مش عارفة ليه ..هو عيب يعني ؟؟


قفلت التليفون وفكرة اني انزل اشتري فانوس بتلح عليا جداا... وبسرعة غير معتادة كنت مستعدة للنزول ....ونزلت لمحل لسه محتفظ


بأشكال الفوانيس القديمة ..ولاقيت فانوس يشبه فانوسي القديم فرحت جدا بيه ..كأني رجعت لأول مرة أمتلكت فيها فانوس


وأستغرب صاحب المحل أني أشتريت فانوس شكله قديم بالرغم من وجود اشكال جديدة ... ولما عرف انه يشبه فانوسي القديم


أستغرب أكتر لان قليل جدا دلوقتي اللي يتمسك بأيام زمااان..... المهم أشتريت الفانوس وكملت طريقي للبيت وانا شايله فانوسي


وحسيت وقتها اني سعدية جدااااا.... وكل سنة وانتم طيبين

هناك 9 تعليقات:

باسم يقول...


السلام عليكم و رحمة الله و بركاته
اختى الكريمة بارك الله فيك بكل خير
و بلغنا جميعا رمضان على خير ما يحب و يرضى لعباده المسلمين
من حقك اختى الكريمة و من حق كل انسان ان يرتبط بذكراياته الجميلة و التى صارت جزء منه جزء من قلبه و روحه
قد يستغربها البعض و يقولون ان الحنين لمثل هذه الذكرايات التى تربطنا باشياء او مناسبات او اشخاص اثـّروا فى حياتنا و تركوا اثرا طيبا هو من باب تضييع الوقت و المال و البال فيما لا طائل منه فما مضى قد مضى

لكن تبقى الذكرى و يبقى الحنين اليها دائما مما يسقى قلوبنا السعادة و الراحة و لو لبعض حين
كل عام و انتم بكل خير
و كل فانوس و انت طيبة
و تعيشى فى اتم خير و تجيبى لكل احبائك ما يدخل عليهم الفرحة و السعادة دائما
((:

nona يقول...

اختى زهرة كل سنة و انتى طيبة
و السنة الجاية زوجك هو الاى يجيب الفانس
انا زيك بحس ان رمضان زمااان كان لية طعم و لون و لية فرحة خاصة و كنت بحس انة مميزة بكل حاجة
اما دلوقتى ما نعرفش اية الاى حصل
بس احنا ديما نحن للماضى الجميل او بمعنى اصح بنحن لطفولتنا ايام ما كنا عايشين و مش شايلين هم الدنيا و لاتعابنين فيهم هى ايام كانت جميلة
و ربنا يجعل كل ايامك سعادة و فرح يا رب
تعرفى انى نفسى انا كمان اشترى فانوس لنفسى بس انا مصرة و عندى امل ان جوزى هو الاى يشترى الفانوس و بدى لنفسى امل و عمر كمان
يا رب يحقق كل الاى نفسك فية و رمضان القادم تكونى اسعد واحدة فى الكون

ahmed_k يقول...

كل سنه وإنتي طيبه يا زهره

وعلى فكره أنا كمان نفسي أشتريلي فانوس زي زمان
بس الخاطره مش بتلح علي أوي
يعني ممكن انسى خالص قصة الفوانيس دي وأنا بره
بس إحنا عندنا فانوس حجم عائلي
في البلكونه
موجود في مكانه من حوالي سبعة سنوات
ومحدش بيشغله خالص إلا في رمضان
كل يوم بعد الفطار
واصبح الفانوس ده له رونق خاص بحياتي
وله زكرياته التي ما زلنا نعيشها
فانوس كباره يعني
وده مخليني مش محتاج اي فانوس خاص لي خالص


تقبلي خالص تحياتي

abo salah يقول...

بعد السلام عليكم

هههههههههههههههههه
ربنا يخليهوملك يارب ودايما تجيبيلهم
أكيد فرحتك كانت بالدنيا وأنتى سبب فى رسم ابتسامة على وجوه أطفال العيلة

وربنا يخليكى ليهم وعقبال ما تجيبى لولادك ان شاء الله

أجمل حاجة أنك مكدبتيش خبر ونزلتى تجيبيلك الفانوس
عشان متخليش نفسك فى حاجة
وتهدئ من طوفان الحنين لأيام زمان

كل سنة وأنتى طيبة
وكل رمضان وأنتى إلى الله أقرب

تحياتى

غير معرف يقول...

ربنا ازد وجوهنا نورا واعطنا من حلا الحور وبلغنا رمضان فرحة وسرور
جميل ان يحن الانسان الى ماضية الاصيل ويتمسك بة فلكل واحد زكريات ماضية يصعب علية نسيانها ولكن هناك بعض الافعال تكون خارجة عن ارادة الانسان كأن يكون بعيدا عن بعض الناس القريبين منة وذلك لاصلاح فكرة لدى بعض الناس زوى القلوب العكرة(السوداء كالليل المطلم)ولا نستطيع ان نبوح بهذا الكلام الى من هم قريبين منا فيصل الفكر لديهم كأنة خصام مع اننا يصعب علينا البعد عنهم لاننا اخوة فقط وليس كما يتصور زوى القلوب السوداء ارجو ان تكون قد وصلت الرسالة

tarek momen يقول...

كل سنه وانت طيبة بمناسبة الشهر الكريم
ومبروك عليكي الفانوس يلا نوريه و قولي
حاللو يا حاللو رمضان كريم يا حاللو

شبح الحقيقة يقول...

شكرا علي مشاركتك والله مش عارف أقول ايه غير حسبي الله ونعم الوكيل كمان يخصموا التبرع من أصحاب المعاشات والموظفين يولعوا في البلد ويسرقوا ويعلوا الأسعار وأحنا اللي بندفع الثمن

عاشقة القمر يقول...

كل سنه وإنتي طيبه وربنا يحفظوا لك عقبال ما تجيبى لولادك ان شاء الله بجد انا عجبني قصه فوانيس في مصر شوفتها سته فات كنت صايمه في مصر و كان نفيس اشتري فانويس جيبها السودان بس مش حصل لكن ان شاءالله اهرسل وجيبها حلو جدا قصه فا نويس

شبح الحقيقة يقول...

السلام عليكم
أختي العزيزه
قبل أي كلام كل سنه وانت طيبه وإنشاء الله تبلغي من الشهر الكريم أعلي الدرجات أياي وأياك وإرضاء الله سبحانه وتعالي
لا أعرف لماذا مجتمعنا يضع أي إنسان عندما يكبر في قفص حديدي والمطلوب منه أن يستمر في الحيات في حدود تلك القضبان وهذا ما يفرسني أيضا الكل حين يكبر ينظر للماضي علي أنها ذكريات وهي الأفضل من حاضره لأن به فرض عليه ليس من دين أو قانون بل من فكر مجتمع لا يعلمون أن المرء مهما كبر لا يزال بداخله قلب الطفل الصغير وهذا القلب الطاهر يقتله المجتمع والناس فاللهم أرحمنا
أختي العزيزه الله وحده هو من سن الفروض والقوانين علي تصرفات المرء وجميعنا نعرفها نها ديننا أما حياتنا فقد أمرنا رسولنا الكريم بأن نعيشها لكن بما يرضي الله فأنصحك ان تدعي هذا الفكر خلفك وتستمتعي بحياتك بما امر الله به
ولعل رغبتك في شراء الفانوس قد تحققت معنويا ليس فعياً وهذا عندما أحضرت الفوانيس للأطفال أختك ورأيت اسعاده في أعينهم وهذه هي السعاده الحقيقه أطال الله عمرك ورزقك رقاً طيبا وجعلك دائما تسعدين الغير لتسعدي
وشكرا علي زيارتك الكريمه وتشريفي برأيك وكلامك الجميل لك خالص تحياتي وتقديري