طبعا كلنا سمعنا عن قضية نهي رشدي المخرجة اللي اتعرضت من قبل شاب للتحرش والمحكمة حكمت لصالحها علي المتهم بالسجن 3سنوات .. الكل فرح بالحكم لانه هيكون رادع لاي شخص يحاول يعمل كده
الكل واقف مع نهي ومساندها والكل بيقول انها بنت جدعه مسبتش حقها يضيع خوفا من الفضيحة
لكن بعد صدور الحكم لصالح نهي حصلت مفاجأه من النوع الصاعق ..
صديق عزيز بعتلي رسالة محتواها الخبر ومصدره ودعوة لأنضمام لجروب ضد نهي علي الفيس بووك
الخبر بيقول
محامية نهي اتخلت عنها واستأنفت القضية لصالح المهتم للأسباب التاليه:
قالت نجلاء لـ «المصري اليوم»، إنها توصلت لمعلومات عن المدعية، جعلتها تقرر التخلي عنها بعد ٣ أيام من صدور الحكم، هي أن «نهي» من عرب ٤٨ ومولودة في يافا شمالي تل أبيب وتحمل جواز سفر إسرائيلياً،
كما سبق أن اتهمت ضابطاً فرنسياً بالتحرش بها أثناء وجودها في فرنسا قبل عام ونصف، وحصلت منه علي تعويض. وأوضحت المحامية تفاصيل معرفتها بهذه المعلومات،
وقالت إنها كانت معها في مقابلة تليفزيونية علي قناة M.b.c وأن المذيع قال لنهي: «حالات التحرش دي مابتحصلش حتي في إسرائيل»، فردت عليه الفتاة: «إسرائيل دي دولة محترمة»
كما سبق أن اتهمت ضابطاً فرنسياً بالتحرش بها أثناء وجودها في فرنسا قبل عام ونصف، وحصلت منه علي تعويض. وأوضحت المحامية تفاصيل معرفتها بهذه المعلومات،
وقالت إنها كانت معها في مقابلة تليفزيونية علي قناة M.b.c وأن المذيع قال لنهي: «حالات التحرش دي مابتحصلش حتي في إسرائيل»، فردت عليه الفتاة: «إسرائيل دي دولة محترمة»
وياريت كمان تشوفوا التعليقات اللي علي الخبر
**************************************************
بصراحة انا اصيبت بما يشبه الصدمة وحسيت اني مضروبة علي راسي وحسيت بتشتت ولخبطة شديده
ياتري مين صح ومين غلط؟؟
ولو المحامية صح هل معرفتش شيء عن نهي اللي بعد الحكم؟؟
ولو نهي كدابة أشمعني اتهمت شريف بالذات ليه مش حد تاني ؟؟
طيب فين الشهود وليه اتفقوا مع نهي؟؟؟
ولو نهي من عرب 48 ده يعني انها كدابه ..طيب ليه؟؟
أسأله كتير جدا مفيش ليها اي اجابة وأتمني مع الوقت حد يوصلنا لأجابة
وأتمني المظلوم يترد له حقه والظالم يتعاقب
والا هنكون عايشيين في غابة تحكمها القوة وليس العدل
هناك 19 تعليقًا:
أدينا حنشوف في الإستئناف
و يا خبر بفلوس بكره يبقى ببلاش
بس حتة التحرش بيها في فرنسا مش عارف هل معناها انها كدابة و لا بختها اسود و لا ايه
صباح الخير يا بشمهندس
انت كنت واقف علي الباب والا ايه؟؟(:
عندك حق ياخبر انهاردة بفلوس بعد الأستئناف هيكون ببلاش
والله حكاية بختها دي انا كمان مش عرفاها
ولكن لو كدابة ايه اللي هيحصل بعد كده؟؟
بجد محاميه متخلفه جدا والله
يعنى هنفترض انها من عرب 48 ايه المشكله
وبعدين كانت فين لما نهى عملت لها التوكيل بالقضيه
بعدين سؤال تانى بقى
هى ايه مشكله انها اتحرش بيها فى فرنسا
هو ده معناه انها المفروض محدش يتحرش بيها تانى ولا ايه هو الواحده مكتوب عليها التحرش مرة واحده فى العمر تانى مرة تبقى كدب
مش فاهمه والله الامخاخ
عموما يا بنتى ولنفترض انها على اى ديانه تانيه واى جنسيه برضه ده يدى الحق للتانى يتحرش بيها بلا قرف بجد
كل اللى المحامية قالته لا ينفى واقعة التحرش
و هو ده المهم فى الموضوع
مش انها منين ولا تاريخها ايه
خالينا نشوف الموضوع بطريقة تانية
لو البنت دى فعلا اسرائيلية و جاية مصر زيارة
هل من حقنا نتحرش بها ؟؟
هل علشان فى مشاعر كره لاسرائيل مننا كمصريين قبل مننا كمسلمين ده يدينا الحق اننا نستبيح نساءهم و نمد ايدينا عليهم و خصوصا اننا فى حالة سلام و مش حرب ؟؟
فى اساسيات لا يمكن النقاش فيها
زى ان التحرش غلط بكل انواعه حتى لو كان اللى قدامنا يستحقه
و فى شىء كمان لو حد قال اه هى عايزة تسوء سمعة المصريين .. طيب ماهى فى فرنسا عملت كده و مسبيتش اللى اتحرش بها
و السؤال الاخير و الاهم
هل فعلا مفيش تحرش فى مصر علشان نقول ده اكيد محصلش ؟؟
للاسف كلنا بنات قبل الولاد عارفين ان التحرش فى الشارع المصرى منتشر و ان اى بنت مصرية محجبة او غير محجبة تعرضت له بطريقة ما سواء باللفظ او الفعل
حتى وان كان الولد ده هيكون كبش الفداء لمنع التحرش
و فى الاخر اعتقد القضاء هيكون عادل و ينطق بالحكم الصح
تلقي محاميه مش اعطتو فلوس مناسبه
قال يعمل كده
ههههه بس انا فسرت كده بس مش ظلموا نشوف بكره الحقيقه ان شاءالله
يعنى هنفترض انها من عرب 48 ايه المشكله
المخامية غلطانة موقف المحامية غريب جداً كونها تستأنف الحكم لصالح المتهم وتقلب علي موكلتها لمجرد أنها كما تدعي تحمل جواز إسرائيلي .... يعني هو التحرش حلال في الاسرائليات وحرام وعيب قوي ومن مفترض نتاكد من الخبر ، وثانيا على فرض صحة ها الكلام وثبوت الواقعه
حتى لو كانت اسرائيلية ووجدت داخل يجب
نحافظ عليها وعلى عرضها فنحن لنا مروئتنا وشهامتنا وتعاليم ديننا
*************************
فيان انتي بطلتي تزورني في مدونتي كنت مستنيك علي ايملي مش شفتك
عرب 48 مش يهود
عرب 48 دول اللي ماتهجروش من فلسطين وقت الاحتلال فاسرائيل ادتهم الجنسيه
وعلي فكره في منهم قام بعمليات استشهاديه
موضوع فرنسا بقي فاللي اعرفه انها فالت انها اتعرضت لتحرش قبل كده
انا معرفش هو كان فين
بس يمكن جدا كانت تقصد ده
أعتقد ان الحقيقه هتبان
وطالما مفيش حد أنكر واقعة التحرش يبقي مايفرقش البنت منين ولا ديانتها ايه
اسلوبك شيق جدا لدرجة اني اضفتك لاحسن المدونات بمدونتي المستقبل مصر
الحق احق ان يتبع...
هنستنى ونشوف
بس لو طلع صح دماغى هتفوت اكتر ماهى مفوتة اساسا هههههههه
اصل كده الواحد مش هيعرف يصدق حاجة تانى
مش عارفة بقى:(((
تحياتى
يا نهار ابيض
معقول الكلام دا؟؟؟؟
دى مصيبه بجد
مصيبه ان المحاميه مكنتش تعرف الكلام دا
على فكرة مش ذنبها انها اتحرش بيها قبل كدا
ولا المشكله انها من عرب 48
لكن المصيبه انها تقول على اسرائيل دوله محترمه
بصي يازهره خلينا نشوف الايام الجايه هتحكم بايه
لان مهما اتقال احنا مش قدامنا الا اقاويل مش مستندات
مساء الخير أحمد الصباغ
مساء الخير زهرة الجنة
أوجه لكما الحديث معا لسبب بسيط أن زهرة الجنة حينما قرأت الخبر على المصري اليوم كانت في حالة دهشة واستياء ، وكأنما ضربها أحد على رأسها ـ بحسب تعبيرها ـ وأرسلت لي ، وقلت أرد عليها مساء حتى أقرأ مقال المصري اليوم وأحيط بالقضية بشكل متكامل لأنني لا أحب تغيير المواقف بسهولة .. وأحمد الصباغ لأنني كنت أتحدث معه في لحظة نشره للبوست في بدايته ، قبل أن يبذل هذا الجهد الخرافي؛ ليحيط بالموضوع بشكل موسوعي، قلت سأرد على البوستين مساء بعد أن أفطر لأنني صائمة وذهني مشتت ..
المهم بالهناء والشفاء لي .. وصوما مقبولا وإفطارا مع النبي محمد في الجنة الذي كان يقدر المرأة ، ويقدر الإنسان في عمومه بعيدا عن جنسيته وجنسه ... وبعد :
أولا هل يعني أنها معها جواز سفر إسرائيلي أن يتم التحرش بها ؟ ولو كانت مسيحية أمريكية أو فرنسية أو يهودية روسية أو حتى يهودية إسرائيلية أليس من حقها أن تصرخ حينما يتم التحرش بها ؟!
أي عدل يا ناس تطالبون به وأي عدالة تنفون عنها لأن معها جواز سفر إسرائيلي ؟!
الله هو العدل ... العدل هو اسم الله الذي ورد في صيغة المصدر وليس اسم الفاعل أو صيغة المبالغة ، فالله هو مصدر العدل .. فكيف ننفيه ونمنحه هكذا دون تثبت ودون روية ؟!
مهما اختلفت هويتها ،فقد تمّ التحرش بها وهي على أرض مصر ومن حقها اللجوء للقضاء المصري حتى لو لم تكن مواطنة مصرية .
ثانيا هل مظهرها هو الذي دفع ذلك المتحرش البرئ الغلبان الضعيف الذي لا يقدر أن يمنع نفسه من أن يمسك بثدي امرأة ويجرها منه وكأنها دابة أو بقرة أو حيوان فوقه كل أعجم ؟ !
أتخيل نفسي وأحدهم يجرني من ثديي وكأنني حيوان لا أكثر .. أموت قهرا على مجرد الخيال ، فما بالنا بمن حدث لها هكذا ؟!
منتهى القسوة والظلم واللانسانية .
ثالثا تطلب تعويضا ؟! ممن ؟! من سائق سيارة يعمل لصالح شركة ؟! أي عقل يقول أن امرأة خريجة جامعات، وتسافر للخارج حتما لعمل . وتسكن مناطق مصر الراقية أن تفكر في تعويضا من رجل مثل هذا ؟! تبقى عبيطة والله !
وإذا كانت ترغب في التعويض وما شابه لماذا لم تبحث لها عن رجل أعمال أو ابن رجل غني ، وهم كُثر ( قال حبيبك قالت أيهم فهم كُثر ) أي تفكير سخيف هذا ؟!
رابعا تلك المحامية العظيمة أين كانت حين تحتم عليها أن تتثبت من هوية موكلتها ، ألم تر هويتها لتعرف مصرية أم نصف مصرية ، أم إسرائيلية ؟!
خامسا كنت أتحدث منذ أيام مع صديق عن إسرائيل وكيف أنها بلد صغير وتتميز عنا نحن ـ العرب ، في نقطتين في غاية الأهمية ، تتميز بالليبرالية والقدرة على محاكمة الفاسدين ، وتتميز كذلك بالاهتمام بالعلم والترجمة وأن ما ينفق من ميزانيتها على العلم والترجمة يفوق الدول العربية مجتمعة ..
هل يحولني ذلك إلى تغيير ولائي نحو إسرائيل ؟! هل يشكك هذا في وطنيتي ؟! هل يحولني هذا إلى مطبعة ؟!
هلا تعقلون يا من تتحمسون لتغيير مواقفكم ببساطة وتهاجمون اليوم ما كنتم تنحازون له أمس ؟!
محبة لأحمد الصباغ
ومحبة لزهرة الجنة
اسمح لي أحمد أن أضع كوبي من هذا التعليق عندها لأنها طلبت رأأي
انا سمعت لقاء البنت دي في البيت بيتك
ومن كلامها محسيتشي انها ممكن تكون كده
و بعيدن الحق حق
ماظنش انها ممكن تكون مدعيه وتاخد تعويض كده
سعدت باول زياره لي لمدونتك
وان شاء الله ماتكونشي الاخيره
ممممم
شوفي يا جميلة
انا بسمع حاجات كتير اوي في الموضوع ده
وزي مانتي قلتي مش عارفه لسه الحق فين
عشان كده أؤثر عدم التعليق
انما سيبك انتي
عامله ايه؟
:)
اه صحيح
مش معنى ده اني موافقه على التحرش ذاته
سواء بقى كانت يهودية او هندية او حتى من بنها البلحة
الفكرة بس ان الاشاعات كترت وده خلاني ماصدقش حاجه خالص الى ان يظهر الحق
لذا وجب التنويه
:)
السلام عليكم
لازم كل فترة يخرجوا علينا بحدوتة وحكاية تبقى هي الشغل الشاغل لكل الناس وكأن العالم خلى من المشكلات ومش فاضل غير مشكلة نهى والمحامية بتاعتها...
طيب بالنسبة لقضايا التحرش فهنقول يمكن هي دي الإستفادة الوحيدة اللي خرجنا بيها من الفيلم ده إن بقى فيه قانون بيهتم بحاجة زي دي وفي عقاب للناس اللي بتتصرف بالشكل ده خاصة مع تزايد مثل تلك الأفعال في الفترة الأخيرة
تطلع بقى نهى إسرائيلية أو حتى من سكان العالم الثالث ده لن يشكل أي فارق ...هي اللي صح ولا المحامية بتاعتها ده برضو مش هبشكل فارق لأن لازال الفعل كما هو ويعني لو هي طلعت إسرائيلية الحكم هينعكس...
أنا بصراحة شايفة إن الموضوع أخد منحنى تاني أكبر من حجمه بكتير وماكنش المفروض يتصعد بالشكل ده ويبقى هو الشغل الشاغل لكافة وسائل الإعلام ...أعتقد إن الظاهرة نفسها واللي أدت لكل ده هي الأولى بالتركيز عليها ومحاولة معالجتها بدلاً من التركيز على أشخاص ممكن يكون هدفهم أولا وأخيراً مجرد تحقيق شهرة...لكن احنا دايماً كده بنيجي على أبسط الأشياء
تحياتي زهرة وشكراً على البوست الجميل ده اللي خلاني أقول الكلمتين اللي كانوا مضايقني بصراحة :)
هيبان كل حاجه
بس نهى اثبت كذب المحاميه لمه طلعت فى البرنامج وورت كل الناس البسبور بتعه وطلعت مصريه
تحياتى
احمد الجيزاوى
مجرد فرقعة إعلاميـة أخرى
الموضوع بالنسبه لي منتهي، ونجلاء دي الله يهديها مش عارف بتعمل اللي عملته ده ليه ؟؟؟؟
السلام عليكم
بصراحه الموضوع انا سمعت عنه بس مش بالتفصيل .. وكمان بصراحه اكبر انا ما كنت مجتاج اني اعرف تفاصيل للموضوع من مصادر غير موثوق فيها او غير متخصصه - موضوعك هذا فيه نقاط كثيره ومتباعده عن بعضها - يعني مثلاً موضوع عرب 48 اللي هما فلسطينيين ويحملون الجنسيه الاسرائيليه واللي عايشين في اسرائيل على انهم مواطنين اسرائيليين وييمارسون حياتهم هناك على هذا الاساس هل يجب علينا اعتبارهم خونه وباعو فلسطين ؟ وبالتالي يجب علينا اننا ناخذ منهم موقف الضد ؟
اعتدت دائماً في المواضيع القضائيه ان اتجنب التعليق عليها لسبب بسيط ولكنه مهم .. وهو ان المواضيع الخاصه بالقضاء هي مواضيع تخصصيه بشكل احترافي يعني لايمكن اي احد يفتي فيها على هواه - لان القضايا في العاده يكون فيها خصمان وكل طرف منهم يحاول انه ينجح على حساب الثاني وهنا كلهم يقدمون ادله صغيره وكبيره واحياناً تفاصيل لاتذكر في الصحف لكنها تغير مسار هذه القضايا ومهمة القضاه تفنيد كل التفاصيل وفرزها وتقييمها والحكم في النهايه لاحد الطرفين - لهذا اقول ان المسأله مو مسألة قضيه نسمع عنها لكنها قضيه حكم فيها اهل التخصص ومش مطلوب من اي عابر انه يقول رأيه فيها :)
تحياتي لك
في امان الله
إرسال تعليق